DZE YA LOD? «8 Mars abog bininga»
A ntsogan edsoe nam, one na, mininga ayem na asiki fe étié olo, ane bemvamba bekarage bo non, ane besiki bod, bikokom bi Zamba. Asu te hm édsoé nam dzan enga tele amos 08 Mars na mininga akar dzeme amos te. Bininga bentoa ya be ministres, bene bengomena, bene bezimbi, melig dzo na a mesu bisié mese ya fam etele, minga atele f’été dzam deda.

Dzé ya lod, a 08 Mars?

Abui biniga avog lanon fo amos abog waban té ayi dzin, ayi abui olugu, amu bakam bon beben, benga kaman ayi étié dzin dzaban, tege bo bi boboo. Eba bevog, bo banon amos té, ane ondzi mot ahe be a mimbog, ndo betam nye kuli a nsen; ane ondzi kabat ehe te a nkol, ndo besuli dzo, entoa fili, a samza kin na, nye ne ye ma nyo? Anga ndemdan hm, anyaban eza mefub, angadi, andaman  éza mefub bidi mekiaè biyem té, mbia miakar wog na mod afub aman baè fa, bentele a menda medzo…ya ?

Abui bininga banon amos 08 Mars, ontoa boa mos ya babo biboboo, akui é nyollo té akui kidi, ane ai ndzon ose, meyok enyunyuu abe bar bengake ba kob bo bekayala a bisalaga mindzon…kaba abede a nlo. Minkanga mi bongo beman ya samba ai bo, ossama okui ya !

Dze ya lod ? Se ngol a nyî a! Ndo ane ha na, to é nyo wakar kam, ayénené dzin, amos 08 Mars, asama aman vola…Ya, Dze ya lod? A mining nnam, éye wa sama ya ? Eyié 08 Mars atoa hm na, nge fam yak us kig, mbe dzam mfe nyolo. Memvoé, melug meben mendamennan étom éyié 08 Mars…Mininga ayi éyié 08 Mars na a bininga, a bininga, bininga, kyé! Betara benga yem, bon a:”me nyolog me mining ma dedan ngok”.

Mbolmiadin miakobo na, Biya atélé fo fe mining étié fili, dzam deda fo fe ane befam. Owoé, he nyié ane hm ontele ya étié dzia ai nnom fam, étié dzin, éya a few a sama ya? Se oson a hi a? Dzé ya lod?

Nga mina yen ne dzom ese yabeb ai mininga. Fam eke sog meyok, bo ne owoé, ane fam; mininga atam a hm ke sog meyoa a….hiyié è…adzo osama, bot benga kobo. Fam ébo ébamba, bot bengakud kob, bo ne eya fam engaso nala. Minga nya a tam hm ke vegele…Woyi wog, nnam ose ongatog.

A bininga ya a 08 Mars tamene tsende na, ya????

Ferdinand Ekobena.