Homélie du 28 octobre 2010

Saint Simon et Jude, apôtres
Ep2, 19-22 ; Ps 18 ; Lc 6, 12-19

« Ndò anga loe bëyegë boe, atòbò bod ete awom ai bebè »

Mfufub ntilan ya binga lań ongoge ongabò na bi bindi e mam biayean bò asu ye na bi baala nyëbë wan, amu Yesu Kristu etam e nye anë zen akode, e nye fë ayi bò na, bi toban ai e mvòm anga kag e bod ba fidi nye. Amos bia dzeme abog mimfufub Simon ban Judas Thaddeus, Nda Zamba yayi na bi taman b’apostel bebè ya bengabi azombo na, ba kii mbè ya onë obëbèèn.

Dze yabò na bi dzeme abog Mfufub Simon ban mfufuf Jude fufulu amos mbòg?
Simon ban Jude bengabò esye Apostel dzaban fufulu. Embò bengakë kad bë haiden ya nnam Perse dòkten Yesu kristu.

E Simon bia taman amos di angabë mod ya dzal CANA, Simon te e nye bë loege na : “man zélote”, siki e nye anë Simon Petrus, nkukuma Apostel.

Eyòń Yesu atòb Simon abele ayoń nnem, Simon anë e mod anë e mod anë ayòk. He da ayòk die andziki bò na, asub gratsia Zamba.

Mbol Zamba akad bò na, tò dzan anë abe, adugan dò vëńan evag, Simon abi azombo na akë akad mbëmbë Foe a minnam oyab.

Simon andziki bad luman ai e bod bë tibili nnam woe: simon anga sye ai ngul esë na, akë akad mbëmbë Foe, avë bë sem minsem afidi na, bayi nyiń a dzoe kristus.

Simon andziki fë bad luman ai ngal bita a mò, ebug Zamba endzò angabëlan ai dzò asu ye na bod bë yëm na, Zamba anë ngòl.

Simon angabò esye te a nnam egypten, a “Mauritanie”, a nnam Lybia, ai a nnam Perse, e ye ban Judas Thaddeus bengakë toban we.

Judas Thadeus angabë za?
Judas angabë manyań Yesu, akiaè bia boe a nkòbò mvolye na: “cousin”. Asusua ye na abò esye Apostel, Judas angabë abò esye mëfub.
Biak kad lań a Evangelium mfufub Yoannes a nlo awom ai nyiena, nlòń mëwom mëbè ai mëbè, e vom Judas asili Yesu na:
“A Ni, dze y’abò na hë bia etam olede wamen, tëgë lëdë wamen bod Ya si?” Miayëm abëń eyalan ya Yesu avë nye, Yesu nye ai nye na:
“Ngë mod adiń ma, ayi nyie bibug biam eyòń te Tara ayi nye diń ndò biayi sò abë nye bisò kom etoa abë nye”.

Amos di, mfufub Simon ban mfufub Judas badugan bi yëgëlë na: Zamba abò ki efial mëyòń. Zamba ayi vë na, mod osë a yèè nye mbè, mod a yèè nnem woe, ban Yesu bëzu kom etoa abë nye. Foe mintag te endzò bengakë ba kad a minnam misë më hë lań moe.
A nlań osu, mfufub Paulus a womolo bi na binë bòn ya Nda Zamba; Biayean nyiń fufulu biayean sye fufulu, ai evag, ai azombo, akiaè mfufub Simon ban mfufub Judas bayëgëlë bia, asu ye na, bi loń e nda bod enë etobògò Zamba, bi bësë bintoa bigzo ya Nyòl kristus.
Bëkristen y’etoa dzi embò bakë ai dzò osu amu bia yëbë Yesu Kristus, bia nòń bë sakrement, biayean fë nyiń, bi lëdege a mimboan na binë bòn ya Zamba adiń.

Mod osë ayean sili e men na :
Nga anë mintag na, anë mod ya Nda Zamba?
Nga awog mbëń eyòń baloe nye na: mòn Zamba, a dzoe kristus?
Dze Kristen yayean bò asu ye na a nòń ngab a esye Nda Zamba yabò?
A etye Kristen dzoe yë wayen e mod mbòg anë etògò Zamba.

Enyiń Mfufub Simon ya bia taman amos di ya lede bi na Yesu aloe mod osë akiaè anë, siki mëfulu emò abëbë.

Yesu ayi na bi bësë bibò bëyege boe, bi bësë bibò esye Apostel. E ngogelan biabò amos osë endzò yayi yèè minnem mian asu ye na gatsia Zamba azu nyii, bi vëńan, bi bò zamba esye.
Zamba ayańan ai Apostel, ayańan ai mod osë yabë mina na, akë atsam mbëmbë Foe, Foe akode, a mëbug mësi mësë.

Ngë dzom ziń ya dzeman wa asu ye na obò esye te, siligi Kristus na avòli wa.
Biazu kë ai mès osu, bi kogëlan ai Nti na : “a Zamba, babëdzań ai e bod bë tsa’a ai bia bayi na bë yëm wa, bë tsende enyiń dzaban, bëbò e mam ma nyeb wa a nnem.
Va të bia gratsia ai ngul e na, bi vòli bò, ai evag, ai nnem mvam asu ye na, obi olugu ai Duma, a mëbug mësi mësë”.

Olugu abò ai Yesu kristus !

Fada OY@MA