Homélie du 22 octobre 2010

Ep 4,1-6 ; Ps 24(23) ; Lc 12,54-59

« Dziban mina mina, ai edin »

A nlan osu, Mfufub Paulus akad bod y’EFESI na bë bò dzom dzia, bë bi nnem mbòg abë Mfufub Nsisim.

Bod bënë dzom dzia amu bëbëlë edin a minnem.
Bayëm dzibi, bayëm sui bò bëben asi amu bënë edzòdi nyòl, fin ai evovoe nnem.
Man Apostel a tëbëlë bi na, bi nyin ai abën mëfulu ma lan, amu ayëm e mam mënë dzam sò ai mindzug:
- Evom bëkristen ban yin a nkunda,
- E vombëkristen bëbëlë mam andzogdo wòbò,
- Ngë ki fò a Nda Zamba esë.

E mam mazu ai mindzug mënë na:
- Esun minkon,
- Ai enyin ngam ngam.
Asu yë na bi toan wog ayëgëlë ya abode Mfufub ntilan ya bi hë lan e kidi nyi, anë mbën na bi dugan tsog mëbende ya Yesu avë e bod bazu ba ton nye.
Yesu akad bò, ndò fë ayëgëlë bia:
-akiaè biayean nyin a zan dzan;
-akiaè manyan ban manyan bayean nyin.
-Yesu alëb bia akiaè mod ayean nyin ai e mod a tsa’a ai nye.

Yesu ayi na:
*bi vaè wòn a nnem
*bi bò akab bi vaè nnem a biem bi ndon ;
* bi bò mam më ngòl amu siki akuma endò abëlë enyin mod.
Yesu adzo na :
*të bia sanan ai e dzom biayi di ngë ki e dzom biayi bòd : Zamba e nye ayëm e dzom enë ai bi mfi.
*Yesu adzo na : bi tòbò a ngomëzëna amu Nti anë bi dzam sò kud mbè, tëgë bi lom mbanda.
Kristen y’ayean tòbò a ngomëzëna na, ban Zamba woe bayi toban.
E bod Yesu avë mëlëbëga, bayëm yen na mvën enë a yob, vièn wazu fiè, nkulu azu vun. Yesu anga kam a na:
-abim aled minnem mi bëlë,
-abim bivus miabò,
-dze yabò na të miayëm na Yesu anë mòn Zamba?
Yesu abò mësimba, akad fë bod e mam mayi toban ai bò ngë balum Zamba mvus, he da, abui ya bëbò anë ngam ngam.
Eyòn mod zin ban manyan bëbëlë etòm, tëgë fò ai e nyò ayëbë na bë tòbò asi, bë man kom etòm te.

Zamba alëb bia e kidi nyi a anyu Mfufub Paulus na: bi dzibii e bod bëvòg ai edin a nnem, bia nyin a nkunda, a mënda bisye ngë ki a mënda më bod.
Eyòn bia nyin fufulu ai edin a nnem, bia lëdë na binë bidzo ya Nyòl Kristus.
Anë ayie na obi akiaè mëfulu da ai e mod a tsa’a ai wa, hëda ngë bi bësë bi bëlë edin a nnem, mam mësë mayi wulu mvoè, amu e mod abëlë nnem edin e nye ayëm dzibi, e nye ayëm dzu.

A dzibi e mod mbòg wa tian na: wa vòli nye ngë anë a mëyanan.
Wa lëb nye, mina nye bëbè, ngë anë a evus, siki na, wake wa lèè ai nnam osë na abò minsem, a nyin abe. Zamba etam e nye ayëm tsig mëdzo.
E mod abëlë nnem edin ayi vë na, manyan abugëban.
E mod ayi ai manyan abe, aloe ntotomo na, azu nye tòbò a nnem.
Mfufub Nsisim e nye ayëm tònlò bëkristen.
Bia yanan ai mfiè woe, bia yanan ai fëg dzie asu ye na, bi bi nnem mvam, nnem bidzuga, nnem ya wayi na, bod bësë bëbugëban a dzoe Yesu Kristus.
E kidi nyi, minsili ya mod osë ayean sili e men mine na:
-yë mënga ben dzu madzan?
-Yë ma kad sui mamen asi, mënga dzaè e mod mbòg bidzuga eyòn mabò nye e dzam awog abe?
-Asu yë na, mëbi mëkiëbë abog asë, nga make makòbò na: e bod bëvòg embò bënë abe, mbëmbë mod anë fò vë ma?
-Eyòn mayen bivus ya e bod bëvòg babò, yë matsig adzo daba, yë mayen bivus bite ai mis më ngòl?
Eyòn obi ya biyalan ya minsili mi, o dzaè hm Zamba gratsia yë na, avë wa nnem edin, akiaè e men abëlë.
E gratsia wa dzaè Zamba, anë efaè ya wa yanan ai dzò amos ben di.
Tarigi fò bëbë e vom wan yin, e vom otoa, evom wa sye, ngë mod zin anë a ete, a wa wog abe.
Këlë yen mod te, subugu nye babi, otari na wa din nye, a dzoe Yesus Kristus.
Biazu kë ai mès osu, bi bësë nnem mbòg, bi kad Zamba na:
A Nti, nnem wòm onë aled anë akòk , mis mam ma dzën vë bivus ya e bod bëvòg babò.
A Nti, yëgëlë ma na, më yen e bod bëvòg, më nòn e bod bëvòg akiaè ma nòn mamen.
Bò të na, bi bësë bi nyin nnem mbòg, ai ngul Mfufub Nsisim.
Bia dzaè wa nala, adzoe Yesu Kristus mòn woe ya avë’ë , a dzoge fë ai wa, dzom dzi dzia ai Mfufub Nsisim, Zamba a kòm ya kòm esë,