Textes: Jonas 3, 1-5.10; Ps 24; 1 Co 7, 29-31; Mc 1, 14-20.

«Abi bëngabi YOANNES, ndò YESUS angakë a GALILEA, anga yëdan MBEMBE FOE y’edzoe Zamba, nye na :
Abog akui ya, edzoe Zamba entoya babi : boan hm endëgëlë, miyëbë, miyëbë fë Mbëmbë Foe».

Yesus a yen na :
- Abog akui ya,
- Abog ayean tari esye,
- Abog ayean tari n’ayëdan Mbëmbë Foe.

A Evangelium Mvòmvòm MARCUS, bi hë wog nlàn ya YESUS a kodo n’akë a GALILEA. Asu dze YESUS akë a GALILEA ?

YESUS akë a GALILEA amu awog e na : YOANNES anë a mimbog.

YESUS a yëm e na, e bod bawog bëbëla abe, bayi na, YOANNES adib anyu. Bayi na, YOANNES abò të bar kòbò e mam  ma tuli bò minnem.

YESUS a Yëm mbëñ mbëñ na, YOANNES a hë bò esye profèt dzie mvòè, akiaè Zamba ayi. Ngë bod bëziñ baluman ai dòkten te, anë ai mfi na, Kristus e men asuan a nsëñ emen a tari na akad Mbëmbë Foe.

Esye ya bë profèt bënga tari a Nnom Amvoe,
Esye ya YOANNES Ndu Bod angabò a nkot’nnam : esye te enë edzi ya wum abëń bibuma.

Zamba anga man tag mam akiaè e na, bikokoma bie bisë bi yen nye ai mis, a nyòl mbañ Mòn woe, YESU Kristus.

Esye te endzò Kristus atari asu e na, e bod bësë ba yëbë nye, Zamba a lad ai bò mkpamań amvoe, Zamba a lad ai bò, amvoe y’anë tëgë man.

Më hë kad min na, YOANNES anga toban ai mindzug a esye profèt dzie :
- Bëfudi nye a mbog,
- a mëmana, ndò fë awu awu Mintye ;
Eyoń Kristus a tòb awola te na, akë a GALILEA, akë e vom ayi toban ai bë haïden akë e vom ayi toban ai e bod ba yëm ki Zamba, akë e vom ayi bi efëma, ziń, ebug mëdzo, YESUS a yëm na, ayi dzugi ai mintye ya klos.

YESUS ayëgëlë min(a) bekristen y’Edzëdzala na : mi bi azombo ai evag asu mam më Zamba.
Bi bësë bi wog ya Mbëmbë foe. Bia bindi nye a nnëm ete heda, biayean dañ bi azombo e na, bikë bia yëdan nye.

Biayean mëm a bod etere na : binë bëkristen.
Biayean lëdë ai abëñ mëfulu më Kristen na, binga duban a Nda Zamba Catholika, ndò fë bia wog ki nyëbë wan osòn.

Eyoń onë mfań Kristen, Wagean Kòbò e vom osë dzam Zamba anë nä : më yëmë a ete anë sen ekanga.

E dòkten YESUS angazu kad,
Mbëmbë foe YESUS ayëdan,
Asëki hë asu YUDEN etam.
Mëbug mësi mësë mayean wodan na : edzoe ZAMBA esuan ya.
Eyoń bia bindi enyiń Kristen dzañ, biayean sili bi bëben na :
Bine akiaè bëkristen afe ?
Yë binë bëkristen hë eyoñ binë a Nda Zamba ?
Yë binë bëkristen hë a awola ngogëlan ?
Yë biayean sa’ala bë haïden ?
Ngë bia sa’ala bë haïden, za ayi bò kad dòkten YESU Kristus?
Dòkten Kristus asëki ayie.
Dòkten Kristus asëki dzam bëyëm bë sikulu.

Eyoń mia wog na, Kristus ayëdan Mbëmbë Foe, Kristus adzo na :
- E bod bësë bënë a mimbog, dań dań mimbog mi nsëm,
- E bod bësë bë tëlë Zamba oyab amu bënga bò nye mëlò, Kristus a kad min(a) na : asò ya mina vë etoa fili, asò ya mina Kuli a mimbog.
- Mbëmbë Foe atian na : bi kodeban ya.
- Mbëmbë Foe ya biake bia yëdan etoa dzi anë na :

Bia mëm Kristus,
Bia yëbë Zamba,
Kristus e nye a vaè minsëm,
Kristus anga tëgë awu,
Kristus anë Mfiè
Kristus anë Enyiń

Anë fò bëbëla na, edzoe Zamba entoya babi.

Bod ba yańan ai edzoe Zamba amu bawog etibili abe, ndò fë minkukuma ya si mi bëlë fulu ebiandi.
Ngë bia nòń mvulena, biayi yen na :

- Mimbubua mia yańan ai edzoe Zamba amu mi bëlë ki afidi afë, Zamba e nye anë bò dzom esë.
- Binë fë dzam lań e bod bawog zie bidi bi enyiń kom.

- Binë dzam lań e bod bënë a mëlunga, e bod ba kòn, e bod ba dzèè afidi : Ebug Zamba endzò ya voli bò.

YESUS akad mina na : anë ai mina, amos osë, akëlë kui a mëmana më si.
Onë Kristen y’Edzëdzala : asu e na, o Kad yë na e mod a tsa ai wa  bibug bi awonon bite, yë wayean tari kë tilban a « Faculté de Théologie » ? Tëge.

Nge ediń enë wa a nnëm,
Ngë wa mvaman ai mam më Zamba,
Kodogo asi, o bò esye Kristen dzoe,
Ai azombo, ai evag, ai ngul Mfufub Nsisim.

Mvòmvòm Marcus a hë lèè bia a Evangelium na : YESUS abò ki esye etam, YESUS atob bod bëziń na, bëkë ba toń nye.

E bod YESUS anga tari tòb bënë bë lòb bë klos.

Bëkristen babëdzań, e dzam asë YESUS abò anë sikulu, amu ayi na, bi bon fëg a ete.
Nlòb onë ayie. Asu e na, o toan bò nlòb :

- Wayean bò odzibi
- Wayean bi azombo e na, o yen anë man mabò ayok,
- Wayean vaè won a nnëm amu wayi kar yen mam mëziń ai zań alu.

Marcus a lèè na, YESUS anga tari loe : SIMON ANDRE YACOB man ZEBEDE ban manyań.

Bod bëte bësë bënga yëbë etye tye na : ba dzoge nlòban kos, bakë ba toń YESU KRISTUS.

Kristus nye anga loe fë bia, amos nduan. Eyoń o wog nloe, të wa bar bëbë a mvus. Bëbëgë fò hë Kristus.

Eyòń Kristus atari esye ai bë lòb bë kos ayi na mi yëm na, asye ki ai mintëtëg mi bod. Kristus asye ki ai e bod bënë na :

- Nnëm a esye,
- Nnëm a mam mëfë.

O wog fë na : wa mëm Kristus,
O wog fë na, wa yëbë Kristus, o yëm na :

- Wa fulan ai nlòb kòs ya a hë lig mvunda,
- Wa fulan ai nlòb kòs ya a hë lig esye mòni, na akë ayëdan Mbëmbë Foe.

Ngë bia toan fas, biayi yen na, kòs enë e dzom onë dzam vol bi, eyòń wa yëm nlòb.

A etye Kristen dzan, sëki kòs endzò mia dzeń. Zamba ayi na, mi lòb bod, mi dudu bod a Nda Zamba dzie.

Bënë abui, e bod ba dzëń Zamba ai nnëm mfuban. Bi bësë binë a enòdi na, bi dudu bò a nda Zamba dzan.

Kòs ya vol nyian a nkun, hëda mod binam a bëlë fëg ndò fë ayëm bëlan ai fëg dzie.

Mod binam anë fili hëda abëlë abui minzizin ya mia sye ai ngul esë na, atëbë Zamba oyab.
Mënga kë lui nkòbò, mëdugan yin na, Kristus aloe bi bësë. Kristus ayi na, bi bësë bi toń nye.

Ngë Wayi wulu ai Kristus,
Ngë Wayi dudu bod a Nda Zamba
Ngë wayi bò esye Kristen dzoe asu e na, DUMA Zamba a tsaman vom osë.

- Fudigi ediń Zamba a nnëm,
- Dzaègè Zamba afib nyëbë,
- Lëdëgë a dzam asë na, wamen obëlë mbëmbë nyian,
- Të wabò na : nkòbò woe, ayëgëlë doe ngë ki e sikulu wavë e bod bë tsa’a ai wa, adugan wa tele a etye mod minal.
- Nge wa nòń afë oyili na, wa tuni Kristus enyin dzoé esë, wayi Kar kòbò, ai mintag a nnëm na :
- A Nti, mavë wa ngań
- Amu wa lëdë ma mëzen moe.
- Ma mëm a mis më bod bësë na : wa onë ZAMBA NKODE Wam.
Ngogelan dzoé, y’enë DZIA mëtaman a mis më Zamba, yayi so ai Wa abui bë gratsia, a enyiń dzoe.
Olugu abò ai YESU Christu.


FADA Daaniel Hervé OYAMA